У мінулую суботу па добрай традыцыі ў гарадскім Палацы культуры адбыўся ўрачысты прыём у старшыні райвыканкама Мікалая Кенды лепшых выпускнікоў Кобрыншчыны. Таксама ў мерапрыемстве прынялі ўдзел дэпутат Палаты прадстаўнікоў Нацыянальнага сходу Рэспублікі Беларусь Аляксандр Зазуля і начальнік упраўлення адукацыі райвыканкама Галіна Радковіч.
Сёлета сямнаццаць выпускнікоў нашага раёна ўдастоены права атрымаць атэстаты аб агульнай сярэдняй адукацыі асобага ўзору і залатыя медалі, адна навучэнка - сярэбраны медаль. Два школьнікі сталі пераможцамі трэцяга этапа рэспубліканскай алімпіады па вучэбных прадметах, пяць - навукова-практычных канферэнцый, тры – трыумфатарамі прэстыжных спартыўных спаборніцтваў.
Звартаючыся да моладзі, старшыня райвыканкама Мікалай Кенда адзначыў, што атрымаць такія ўзнагароды ў самым пачатку жыцця – вялікі гонар для кожнага юнака і дзяўчыны. На сучасным этапе краіне, як паветра, неабходны інтэлектуальная эліта, высокія прафесіяналы сваёй справы, якія будуць знаходзіцца заўсёды ў авангардзе перспектыўных сфер народнай гаспадаркі, сваімі ведамі і дасягненнямі ўмацоўваць аўтарытэт Беларусі ў свеце. Мікалай Аляксеевіч ад усёй душы павіншаваў выпускнікоў з заканчэннем школы, таксама шчыра падзякаваў бацькам і настаўнікам за тое, што ўклалі ў выхаванне маладой змены максімум сіл і энергіі. Старшыня райвыканкама пажадаў прысутным моцнага здароўя, поспехаў і шчасця.
Далучыліся да гэтых цёплых віншаванняў Аляксандр Зазуля і Галіна Радковіч. Таксама да выпускнікоў з найлепшымі пажаданнямі звярнуліся маці выпускніка Алена Васількова, уладальнік тытула “Лепшы настаўнік 2011 года”, выкладчык фізкультуры СШ №9 Міхаіл Бандарук. Ад імя выпускнікоў-медалістаў выступіла цяпер ужо экс-навучэнка Імянінскай СШ Ангеліна Ратайка.
Ва ўрачыстай абстаноўцы юнакі і дзяўчаты атрымалі запаветныя атэстаты, медалі і кветкі. …А ўсяго праз некалькі гадзін яны разам са сваімі аднакласнікамі кружыліся ў развітальным вальсе на выпускных балях.
Раман МЕЛЬНІК.
НА ЗДЫМКУ: Мікалай Кенда, Аляксандр Зазуля і Галіна Радковіч з лепшымі выпускнікамі Кобрыншчыны.
Фота аўтара.
Поделиться в соцсетях:
