Фігурнае катанне заўсёды зачароўвае грацыяй і гармоніяй. Тым больш, калі бачыш яго не па тэлевізары, а ў рэальнасці. Такая ж атмасфера прыгажосці і чараўніцтва панавала і ў мінулую пятніцу ў лядовай арэне, дзе адбылося навагодняе прадстаўленне на лёдзе навучэнцаў Кобрынскай ДЮСШ па зімовых відах спорту, а таксама фігурыстаў з Брэста.
Індывідуальныя і групавыя выступленні ў поўнай меры адлюстроўвалі святочную атмасферу. Кобрынскія спартсмены разам са сваімі трэнерамі Інай Кузьміной, Ірынай Косінцавай і Дар’яй Сяглюк падрыхтавалі нумары паводле казачных матываў. І нават самыя галоўныя навагоднія персанажы Дзед Мароз і Снягурка таксама павіншавалі прысутных на каньках.
Феерычнае свята на лёдзе праляцела непрыкметна. За свае яскравыя выступленні маленькія спартсмены былі заахвочаны прыемнымі падарункамі ад старшыні райкама прафсаюза работнікаў культуры Людмілы Аносавай у межах акцыі “Прафсаюзы - дзецям”.
Як адзначыў намеснік дырэктара лядовай арэны Вадзім Мірашнічэнка, тры гады напружаных і планамерных заняткаў нашых спартсменаў далі свой плён. Сёлета кабрынчане прадэманстравалі добрую падрыхтоўку на абласных спаборніцтвах па фігурным катанні і занялі там прызавыя месцы. А гэта шоу-праграма для іх - своеасаблівы кастынг перад наступнымі адказнымі стартамі. Безумоўна, вялікую ролю ў трэніровачным працэсе адыгрываюць і прадстаўнікі бацькоўскага камітэта, якія ўсебакова імкнуцца падтрымаць сваіх дзяцей. У 2013 годзе адбудзецца першынство Беларусі па фігурным катанні “Зорачка”, куды запрошаны і кабрынчане.
[gallery link="file" order="DESC" columns="2"]
Раман МЕЛЬНІК.
Фота аўтара.
Поделиться в соцсетях:
