15 сакавіка – Дзень спажыўца
Сёлета Міжнародная федэрацыя спажывецкіх арганізацый праводзіць тэматычныя мерапрыемствы пад дэвізам “Спажыўцы за сумленныя фінансавыя паслугі”, якія накіраваны перш за ўсё на павышэнне ўзроўню прававой адукаванасці грамадскасці. Актыўна ўключылася ў гэту кампанію і Кобрынская раённая арганізацыя абароны спажыўцоў. Аб тым, як патрэбна правільна адстойваць свае правы і інтарэсы, расказвае старшыня гэтай структуры Барыс Чубараў.
- Усяго ў мінулым годзе асабіста да мяне звярнуліся за дапамогай больш за 1200 чалавек. Прадпрыемствам, установам і індывідуальным прадпрымальнікам накіравана 46 прэтэнзій, 24 звароты - у суд. Дарэчы, практычна ўсе судовыя працэсы былі пераможнымі для спажыўцоў. Адзначу, што большасць праблемных пытанняў вырашаецца ў вусным парадку, па тэлефоне. Найбольшая колькасць зваротаў тычыцца няякаснага абутку і аказання паслуг. За прыкладамі далёка хадзіць не трэба. Жанчына набыла на рынку прыгожыя імпартныя боцікі, але не паклапацілася аб тым, каб узяць фінансавы дакумент. Ім можа быць касавы, таварны чэк, адрыўны талон ці прыходны касавы ордэр. На тэхнічна складаныя тавары - гэта адзначаны тэхнічны пашпарт ці гарантыйны талон, а таксама таварна-транспартная накладная. Калі гэтыя дакументы адсутнічаюць, неабходна патрабаваць распіску, дзе ўказваюцца найменне прадукцыі, калі і за колькі яна была набыта, даныя прадаўца. Літаральна праз некалькі дзён боцікі сталі прамакаць. Жанчына звярнулася да прадпрымальніка з прэтэнзіямі, але даказаць факт набыцця тавара менавіта ў яго без чэка ці раўназначнага дакумента надта складана. Выратавала тое, што згодна з Законам аб абароне правоў спажыўцоў для доказаў могуць выкарыстоўвацца таксама і паказанні сведкаў. А ў той дзень пакупніца якраз выбірала абноўку са знаёмай.
У сферы паслуг таксама нярэдка здараюцца не зусім прыемныя сітуацыі. Напрыклад, адна з арганізацый, якая займаецца вытворчасцю мэблі, катэгарычна не жадала заключаць пісьмовыя дагаворы з кліентамі і выдаваць на рукі квітанцыі аб аплаце. Вось і атрымлівалася ў выніку, што грамадзяне заказвалі адзін дызайн мяккай мэблі, а ім рабілі зусім іншы, ды яшчэ і нізкай якасці. Трэба памятаць, што ў такім выпадку ў офісе, дзе аказваюцца паслугі, абавязкова заключаецца дагавор, у якім указваюцца ўсе рэквізіты бакоў, кошт выкананых работ, тэрміны, магчымыя форс-мажорныя абставіны і інш. Да гэтага дагавора можа дадавацца і заказ, які з’яўляецца яго неад’емнай часткай.
Хочацца таксама нагадаць кабрынчанам аб уважлівасці пры заключэнні крэдытных дагавораў. Многія з нас сутыкаліся са стандартнай сітуацыяй, калі такія паперы траплялі ў рукі на трох лістах, надрукаваных з абодвух бакоў ды яшчэ і дробным шрыфтам. Такі вялікі аб’ём інфармацыі патрабуе абавязковага дэталёвага аналізу прафесіянальнага юрыста і яго рэзюмэ.
Летась у райвыканкаме ГА “Беларускае таварыства абароны спажыўцоў” пад кіраўніцтвам Ганны Сушы ажыццяўляла выязны прыём кабрынчан па праблематыцы жыллёва-камунальнай гаспадаркі і жыллёва-будаўнічых кааператываў. Як паказала жыццё, такое мерапрыемства выклікала пазітыўны рэзананс. Дарэчы, сёлета аналагічны прыём па спажывецкіх пытаннях будзе ажыццяўляцца ў Брэсце. Магчыма, што госці са сталіцы з рабочым візітам наведаюць і Кобрын.
Кансультацыйна-прававую падтрымку спажыўцы ў нашым горадзе могуць атрымаць па тэлефоне 795-36-75.
Гутарыў Раман МЕЛЬНІК.
На здымку: Барыс Чубараў і Ганна Суша(зправа) прыймаюць грамадзян.
Поделиться в соцсетях:
