З нагоды дваццаціпяцігоддзя ветэранскага руху ў Рэспубліцы Беларусь у актавай зале ААТ “Кобрынская птушкафабрыка” праводзіўся ўрачысты сход. З цудоўным святочным настроем ветэраны віталі адзін аднаго, дзяліліся апошнімі навінамі, узгадвалі падзеі мінулага.
Старшыня пярвічнай ветэранскай арганізацыі птушкафабрыкі Мікалай Ярашук плённа займаецца грамадскай дзейнасцю. У радах “пярвічкі” 328 ветэранаў, з якіх 6 – удзельнікі Вялікай Айчыннай вайны. Нягледзячы на складанае фінансавае становішча птушкафабрыкі кіраўніцтва сумесна з прафкамам і ветэранскім актывам распрацавала і ўключыла ў калектыўны дагавор пункт, які прадугледжвае разнапланавую сацыяльную дапамогу заслужаным людзям. Як адзначыў ў сваёй справаздачы Мікалай Ярашук, толькі ў 2011 годзе на патрэбы ветэранаў прадпрыемства выдзелена 21 млн. 800 тыс. рублёў. У юбілеі і памятныя даты заслужаным людзям уручаюцца падарункі.
Мікалай Іванавіч пажадаў прысутным здароўя і дабрабыту, шчасця і мірнага неба, павіншаваў з 25-годдзем ветэранскага руху. Дырэктар птушкафабрыкі Дзмітрый Місюк паведаміў ветэранам аб стане спраў на прадпрыемстве, растлумачыў, якімі шляхамі мяркуецца выходзіць з крызісу. Дзмітрый Уладзіміравіч адказваў на многія пытанні з залы.
Былы галоўны ветэрынарны ўрач птушкафабрыкі, інвалід Вялікай Айчыннай вайны Міхаіл Гароднік падзякаваў кіраўніцтву за клопат і ўвагу да пажылых людзей.
Раман МЕЛЬНІК.
НА ЗДЫМКУ: (злева направа) ветэраны працы ААТ “Кобрынская птушкафабрыка)” Настасся Старыкава, Людміла Елісеева, Міхаіл Гароднік, Мікалай Ярашук і старшыня прафкама Таццяна Трайчук.
Поделиться в соцсетях:
