Клопат пра здароўе іншых, які і складае аснову працы любога ўрача, - выбар не з самых лёгкіх. І, мабыць, кожны згадзіцца – чалавек, які выбраў для сябе такі шлях, павінен пацвярджаць каштоўнасць здаровага ладу жыцця не толькі сваёй работай – але і уласным жыццём. Менавіта прапаганда здаровага ладу жыцця на ўласным прыкладзе стала галоўным лейтматывам абласной спартакіяды работнікаў сістэмы аховы здароўя, якая прайшла нядаўна ў Кобрыне.
- Сённяшняе мерапрыемства - гэта этап падрыхтоўкі да рэспубліканскай спартакіяды, якая будзе праходзіць у чэрвені ў Пінску, - расказвае старшыня абласнога камітэта прафсаюзаў работнікаў аховы здароўя Анатоль Гаршчарук. – Такія вось рэгіянальныя спартакіяды, як сённяшняя, – гэта магчымасць адабраць лепшых для ўдзелу ў зборнай камандзе вобласці. Штогод мы праводзім тры-чатыры такія сустрэчы, дзе кожны ўдзельнік можа праявіць сябе ў тых відах спорту, якія яму падабаюцца.
А прасторы для выбару на спартакіядзе было шмат. Урачы гулялі ў валейбол, бегалі, падымалі цяжкія гіры. Не засталіся ўбаку і такія віды спорту, як настольны тэніс, дартс, нямала жадаючых знайшлося паспрабаваць свае сілы і на зялёным сукне більярда. Значная частка спаборніцтваў праходзіла на базе КСДЮШАР, у якой знайшлося месца ўсім жадаючым, нягледзячы на вялікую загружанасць гэтага спартыўнага аб’екта. І нават не па-веснавому халоднае надвор’е не перашкодзіла правесці бегавы этап шматбор’я “Здароўе”, які прайшоў на стадыёне “Юнацтва”. Адным словам – сумаваць не давялося нікому. І ўсё-такі – што атрымліваюць ад падобных мерапрыемстваў самі іх удзельнікі? З гэтым пытаннем мы звярнуліся да інспектара па браніраванні і воінскім уліку Кобрынскай ЦРБ Таццяны Чапелевіч.
- Са спортам я сябрую ўсё сваё жыццё. Займалася ім у школе, у інстытуце – не забываю і зараз. І справа нават не ў тым, што прапаганда здаровага ладу жыцця – наша работа. Проста гэта цікава, прыемна і карысна.
Як адзначыў галоўны ўрач Кобрынскай ЦРБ Вячаслаў Крывецкі, зразумела, ніхто з удзельнікаў спартакіяды не марыць пра нейкія там алімпійскія рэкорды - справа не ў гэтым. Галоўнае, што з кожным днём здаровы лад жыцця займае ў нашым жыцці ўсе больш важнае месца.
Дзмітрый БЯЛОЎ.
Фота аўтара.
Поделиться в соцсетях:
