Николай Кенда: «В центре внимания власти - человек, и его конкретные проблемы».

Асабісты прыём старшыні райвыканкама Мікалая Кенды, які адбыўся нядаўна, яшчэ раз пацвердзіў, што ў цэнтры ўвагі ўлады знаходзіцца чалавек – і яго канкрэтныя праблемы. У гэты раз сустрэчы са старшынёй чакалі як фізічныя асобы, так і індывідуальныя прадпрымальнікі. Так, адразу некалькі чалавек звярнуліся па пытаннях прадастаўлення ў арэнду зямлі для вядзення сялянска-фермерскай гаспадаркі. Мікалай Кенда з вялікай увагай выслухаў іх і адзначыў, што такім  прапановам варта ісці насустрач – зразумела, у адпаведнасці з існуючым заканадаўствам. Грунтоўны адказ атрымала і сям’я прадпрымальнікаў, якія цікавіліся дэталямі набыцця памяшкання для расшырэння вытворчасці і спынілі свой выбар на будынку былога аграхімцэнтра на тэрыторыі Кіселявецкага сельвыканкама. Адпаведнае даручэнне па вырашэнні пытання дадзена першаму намесніку старшыні райвыканкама Алегу Гангалу.

Адзін са зваротаў быў прысвечаны пытанням працоўных адносін на прадпрыемстве – грамадзянін звярнуўся з праблемай парушэння ў сферы аплаты працы і складаных узаемаадносін у калектыве. Старшыня райвыканкама даручыў высветліць акалічнасці і падкрэсліў, што ўсе парушэнні, калі яны існуюць, будуць выяўлены і выпраўлены. Актуальнымі застаюцца і транспартныя пытанні – так, у ходзе адной гутаркі была ўзнята праблема маршрутных таксі і добрасумленнага выканання сваіх абавязкаў індывідуальнымі прадпрымальнікамі ў сферы пасажырскіх перавозак. Намесніку старшыні райвыканкама Аляксандру Майсеюку даручана стварыць камісію з удзелам супрацоўнікаў аўтапарка №16 і праверыць работу маршрутных таксі, на якія паступілі скаргі.

На жаль, не ўсе грамадзяне пакуль яшчэ разумеюць, у якіх выпадках трэба ісці на прыём да старшыні райвыканкама. Між тым рабіць гэта патрэбна толькі ў тым выпадку, калі не далі свайго выніку звароты ў ніжэйшыя інстанцыі ці калі з гэтым вынікам грамадзянін не згодны. Існуюць выпадкі, калі прыходзяць з адным і тым жа пытаннем некалькі разоў – хаця ўжо атрымалі заключэнне кампетэнтнай камісіі, такім чынам забіраючы час і ў сябе, і ў старшыні райвыканкама. Не з’яўляюцца рэдкасцю і выпадкі, калі на прыём да старшыні людзі прыходзяць з пытаннямі міжасабовых ці міжсуседскіх адносін і канфліктаў, якія прыстойней было б высветліць па-людску, між сабой, як кажуць, не выносячы смецце з хаты.

Як правіла, работа ў час прыёму была арганізавана так, каб вырашаць праблемы грамадзян з найбольшай эфектыўнасцю. Кожнаму, хто запісаўся на прыём, быў вызначаны свой час – каб не ствараць чаргі, якой практычна і не было. Па кожным пытанні пры неабходнасці ў час прыёму запрашаліся адпаведныя спецыялісты, у чыёй кампетэнцыі знаходзіцца вырашэнне праблемы. У выніку ўсе грамадзяне атрымалі на свае пытанні грунтоўныя і кампетэнтныя адказы – без увагі не застаўся ніхто.

Дзмітрый БЯЛОЎ.

Фота аўтара.