Пахмурнай, халоднай і дажджлівай была раніца ў мінулую сераду. Тым не менш, як сведчаць эксперты, менавіта такое надвор’е аптымальна падыходзіць для высаджвання лясных культур. Гэты веснавы дзень для працы за гарадскімі межамі выбралі ўдзельнікі добраахвотнай агульнарэспубліканскай акцыі “Тыдзень лесу-2015”, якая па ініцыятыве Міністэрства лясной гаспадаркі маштабна праходзіла ў тым ліку і на Кобрыншчыне. Адметна, што сёлета гэта мерапрыемства прысвечана 70-годдзю Вялікай Перамогі.
Кардынальна змянілі свой дрэс-код на нефармальны і больш зручны супрацоўнікі райвыканкама на чале з Аляксандрам Зазуляй, а таксама актыўная частка дэпутацкага корпуса пад кіраўніцтвам Івана Даўжука, прадстаўнікі РА РГА “Белая Русь”, РК ГА “БРСМ”, РАНС. Удзельнікі акцыі прыбылі на тэрыторыю Запрудскага лясніцтва Кобрынскага доследнага лясгаса, дзе пасля атрымання спецыяльных прылад працы –мячоў Колесава - і інструктажу па тэхніцы бяспекі па-гаспадарску распачалі пасадку насеннага матэрыялу на плошчы 0,4 га.
Як адзначыў генеральны дырэктар Брэсцкага дзяржаўнага вытворчага лесагаспадарчага аб’яднання Аляксандр Тыцык, акцыя “Тыдзень лесу” праводзіцца вось ужо шосты год. Асноўная задача мерапрыемства застаецца нязменнай – прапаганда руплівых адносін да лесу, а таксама прыцягненне грамадскасці да вырашэння агульнадзяржаўных задач у сферы узмацнення экалагічнай, эканамічнай і сацыяльнай ролі лясоў.
Кожны жыхар краіны, які шчыра жадае пасадзіць дрэва, мае такую цудоўную магчымасць дзякуючы дапамозе і падтрымцы супрацоўнікаў лясгасаў. І, як паказала сёлетняе мерапрыемства, такіх энтузіястаў было нямала – ад дзяцей да пенсіянераў. Усяго ж у бягучым годзе супрацоўнікамі лясной гаспадаркі Брэстчыны запланавана стварэнне лясоў на агульнай плошчы 2305 га. Для гэтых мэт падабраны і якасныя сеянцы, якія адрозніваюцца высокай трываласцю. Як адзначыў Аляксандр Майсеевіч, кобрынскі доследны лясгас займае лідзіруючыя пазіцыі ў Брэсцкай вобласці па вытворчасці такога насеннага матэрыялу. Дырэктар Кобрынскага доследнага лясгаса Анатоль Леванюк прапанаваў удзельнікам акцыі элітны матэрыял сеянцаў ліпы, сасны і бярозы.
Заўзята і натхнёна валодаў мячом Колесава Аляксандр Зазуля, які разам з дырэктарам СШ № 2 Аляксандрам Кудраўцавым адразу ж набралі зайздросны тэмп сяўбы і выбіліся ў лідары сярод усіх удзельнікаў акцыі. Кіраўнік раёна адзначыў важнасць правядзення “Тыдня лесу” на Кобрыншчыне, падкрэсліў неабходнасць захавання і прымнажэння “зялёнага багацця”.
…І вось нечакана з-за цяжкіх хмар паказаліся промні сонца, якія пяшчотна лашчылі крохкія пруткі сеянцаў. Прайшоў шчодры дождж. Ужо праз дзесяцігоддзе тут будзе прыгожы малады лес. Як нам паведаміў на развітанне Аляксандр Тыцык, у нашых продкаў існавала павер’е – любому чалавеку, які з шчырым жаданнем уласнымі рукамі пасадзіць дрэва, абавязкова калі-небудзь пашанцуе ў жыцці. Спадзяемся, што так яно і будзе!
Раман МЕЛЬНІК.
Фота аўтара.
