Напярэдадні прафесіянальнага свята дырэктар КУШВП ЖКГ “Кобрынская ЖКГ” Сяргей Ялец адказаў на шэраг актуальных пытанняў карэспандэнта “КВ”.
- Сяргей Пятровіч, як захаваць той непаўторны выгляд, які набыў наш Кобрын?
- Сапраўды, у мінулым годзе пры падрыхтоўцы да правядзення рэспубліканскага фестывалю-кірмашу працаўнікоў сяла “Дажынкі-2009” быў выкананы вялікі аб’ём работ па добраўпарадкаванні горада. Абноўлены вуліцы, створаны новыя архітэктурныя ансамблі. На балансе КУШВП ЖКГ “Кобрынская ЖКГ” знаходзіцца 361 жылы дом, 12 інтэрнатаў і інш. Аб’ёмы работ у нашых падраздзяленняў павялічыліся. Важна кожны дзень забяспечваць утрыманне аб’ектаў гарадской інфраструктуры належным чынам. Сілы і сродкі дазваляюць гэта зрабіць якасна і аператыўна. Многае залежыць ад самасвядомасці і ўзроўню культуры кабрынчан, якія павінны берагчы створаны цуд.
- Як размяркоўваеце акцэнты ў рабоце сёлета?
- У гэтыя дні аўтатэхніка, многія спецыялісты ЖКГ задзейнічаны ў ачыстцы і прыбіранні вуліц горада, рамонце і ачыстцы ліўневай каналізацыі. Добраўпарадкоўваем горад пасля зімы. Працягваюцца работы па капітальным рамонце і цеплавой рэабілітацыі аб’ектаў жыллёвага фонду, рэканструкцыі цэнтральнай кацельні.
Сёлета прадугледжана ўладкаванне гравійнага пакрыцця па вул. Чыстай, 17 Верасня, Набярэжнай, 9 Мая, Тапалінай, Альховай, А.Неўскага, Далубоўскага, завулкаў Авіяцыйны, Кляновы, Заходні. Плануецца правесці ліўневую каналізацыю па вул. Дзяржынскага, Чыгуначнай, 50-годдзя БССР, Першамайскай, Паўднёвай, Някрасава і інш. Запланавана пасадка дрэў на цэнтральных вуліцах горада, будзе высаджана каля 260 тыс. кветак.
- Напярэдадні Вашага прафесіянальнага свята што пажадаеце свайму калектыву?
- Хочацца адзначыць плённую працу работнікаў зялёнага будаўніцтва, дворнікаў, вадзіцеляў, трактарыстаў, супрацоўнікаў участка абслугоўвання і бягучага рамонту жылфонду, цэха кацельнай гаспадаркі і інш. Ад усяго сэрца жадаю калегам міру, спакою, дабрабыту ў сем’ях і выдатнага настрою, з якім хочацца працаваць.
Гутарыў Раман МЕЛЬНІК.
Фота аўтара.
НА ЗДЫМКУ: дырэктар КУШВП ЖКГ “Кобрынская ЖКГ” Сяргей Ялец, майстар і прадавец участка саначысткі, добраўпарадкавання і азелянення Любоў Трубчык (справа) і Алёна Джайгала ўдакладняюць працоўны план на бліжэйшы тыдзень.
Поделиться в соцсетях:
