Народнаму ансамблю песні і музыкі “Зараніца” Магдалінскага сельскага Дома культуры ў мінулым годзе споўнілася 20 гадоў. За гэты час у калектыву сабраўся цэлы архіў грамат, дыпломаў і ўзнагарод шматлікіх конкурсаў самага разнастайнага ўзроўню. А нядаўна кіраўнік ансамбля Алена Букач атрымала яшчэ адну высокую адзнаку творчасці свайго калектыву – падзяку Міністэрства культуры Рэспублікі Беларусь за добрасумленную працу, узорнае выкананне працоўных абавязкаў і дасягненне высокіх паказчыкаў у рабоце, якую ўручыў міністр культуры Павел Латушка. У чым жа сакрэт поспеху?
- Галоўнае – проста любіць сваю справу, - расказвае Алена Паўлаўна. – Любіць песню, любіць сцэну, любіць сваіх слухачоў, якія абавязкова будуць плаціць вам узаемнасцю. І працаваць над сабой кожны дзень… І вельмі прыемна, што ўсё гэта можна з упэўненасцю сказаць пра ўсіх членаў нашага калектыву.
Дарэчы, дзейнасць калектыву на самой справе вельмі прадуктыўная. Толькі за мінулы год “Зараніца” дала ў раёне 53 канцэрты, 32 з іх – у сельскай мясцовасці. Застаецца толькі здагадвацца, колькі энергіі і энтузіязму патрабуе такая работа. Ёсць у калектыве і свой кампазітар – Аляксей Кірыеўскі, актыўна і паспяхова распрацоўваецца гумарыстычны жанр, якім займаецца Яраслаў Берлажэцкі. А яшчэ ёсць непаўторнае адчуванне сапраўднага свята, якое нязменна суправаджае кожнае выступленне ансамбля.
Дзмітрый БЯЛОЎ.
Фота з архіва Алены Букач.
Поделиться в соцсетях:
