Кобрынскі Палац культуры – сапраўдная кузня талентаў. Упэўніцца ў гэтым у чарговы раз можна было ў межах дня адчыненых дзвярэй, які адбыўся тут 6 верасня.
Свята захапленняў пачалося з гульнявой праграмы. Вясёлая музыка, казачныя персанажы, паветраныя шары і іншыя прыемныя моманты адразу настроілі гасцей на святочны лад. Сваю дзейнасць дзіцячыя гурткі прадставілі праз тэатралізаваны спектакль-казку “Кветка жаданняў”, у інсцэніроўцы якой, акрамя асноўных герояў - удзельнікаў узорнай тэатралізаванай студыі “Рытм”, былі задзейнічаны выхаванцы практычна ўсіх творчых калектываў. З дзейнасцю узорнай студыі дэкаратыўна-прыкладной творчасці “Натхненне” можна было пазнаёміцца ў фае Палаца культуры, дзе размясціліся разнапланавыя выставы.
Як заўважыла загадчык аддзела па рабоце з дзецьмі Ірына Дубінская, сёлета для дзяцей Кобрынскі Палац культуры прапануе 10 гурткоў розных накірункаў: акрамя вышэйадзначаных, дзейнічаюць узорная цыркавая студыя “Сонейка”, акрабатычна-цыркавы гурток “Вяснушкі”, студыі эстрадных спеваў “Праменьчык” і “Аіда”, студыя танца “Амадэус”, падрыхтоўчая танцавальная група “Baby dance”, група мажарэтак і студыя фітнесу.
Набор у гурткі ажыццяўляецца з пяці гадоў. Асноўная маса выхаванцаў – дзеці школьнага ўзросту. Ірына Мікалаеўна заўважыла, што многія “выпускнікі” пры наяўнасці часу працягваюць наведваць калектывы. Адзначыла яна і той факт, што ў апошнія тры гады творчыя гурткі сталі асабліва запатрабаванымі ў дзяцей старэйшага школьнага ўзросту.
Жадаючых запісаць сваіх дзетак у творчыя калектывы Кобрынскага Палаца культуры сабралася поўная зала. Многія з гасцей адзначалі, што з выбарам гуртка вызначыліся загадзя. Напрыклад, Вольга Парфянюк з пяцігадовым сынам Ягорам вырашылі далучыцца да цыркавых артыстаў студыі “Сонейка”. А вось Іна Мудрая з шасцігадовай дачкой Уладай зрабілі выбар на карысць вакальнага мастацтва. “Люблю спяваць”, - важна адзначыла мне дзяўчынка. Перавагу танцам ужо чатыры гады аддае дзесяцігадовая Ганна Андранюк. Разам з сяброўкай яна прыйшла пацвердзіць свой удзел у дзейнасці студыі танца “Амадэус”.
На базе Кобрынскага Палаца культуры дзейнічае шмат разнажанравых калектываў для дарослых, запісацца ў якія таксама была магчымасць. Дарэчы, колькасць усіх удзельнікаў у мінулым годзе склала каля 700 чалавек.
Калектывы Кобрынскага Палаца культуры актыўна вядуць канцэртную работу. Як заўважыла Ірына Мікалаеўна, на 90 працэнтаў канцэртныя праграмы ладзяцца ўласнымі сіламі. Заўсёды годна прадстаўляюць калектывы сваю ўстанову і горад на мерапрыемствах раённага, абласнога, рэспубліканскага і міжнароднага ўзроўняў. Гурткоўцы пастаянна займаюць прызавыя месцы ў розных конкурсах, што сведчыць пра іх высокі ўзровень падрыхтоўкі і кваліфікацыю педагогаў.
Хочацца спадзявацца, што новыя ўдзельнікі, якія толькі што папоўнілі рады творчых калектываў, з поспехам працягнуць эстафету.
Людміла ДУБІНА.
Фота аўтара.
