Для ўдзельнікаў узорнай вакальнай студыі “Крыніца” Кобрынскага раённага цэнтра дзіцячай творчасці кожнае выступленне адзначаецца моцнымі ўражаннямі, якія за майстэрскае выкананне песень яны атрымліваюць ад удзячных гледачоў. Вось і ўдзел у І адкрытым рэспубліканскім конкурсе юных вакалістаў, што праходзіў у рамках фестывальнага праекту «Zvezдочет» з 9 па 11 лютага ў Магілёве, падарыў 11 крынічанам-канкурсантам незабыўныя эмоцыі.
Выступленні на вялікай сцэне для ўдзельнікаў “Крыніцы” - з’ява нярэдкая. Юныя артысты актыўна ўдзельнічаюць у разнастайных песенных конкурсах і фестывалях, што, па словах кіраўніка калектыву Аксаны Амельянюк, дае дзецям добры вопыт. Пра конкурс у Магілёве вакалісты “Крыніцы” даведаліся з сеткі інтэрнэт, і адразу падалі заяўку - асаблівую цікавасць да фестывалю выклікала тое, што ў якасці суддзяў выступалі людзі, якія атрымалі прызнанне на высокім узроўні: фіналісты телепраектаў “Х фактар”, “Еўрабачанне”, “Голас”.
- Удзельнічаць у конкурсе, у якім вядзецца адкрытае галасаванне, безумоўна, складана. Адна справа, калі артыст выступае і завочна атрымлівае ацэнку, і зусім іншая, калі цябе судзяць адразу на сцэне, - дзеліцца ўражаннямі Аксана Яўгеньеўна. – Нашы дзеці – малайцы. Паказалі сябе найлепшым чынам.
Конкурс праводзіўся ў намінацыях “Вакал” (эстрадны, акадэмічны, джазавы) і “Вакал народны”. Вакальная група ў складзе Ксеніі Швед, Анастасіі Верамейчык, Ірыны Амельянчук і Анастасіі Давідзюк ва ўзроставай катэгорыі 12-13 гадоў за песню “Ды ў святліцы” была адзначана дыпломам І ступені. Для Ксеніі Швед фестываль стаў сапраўды зорным:
высокую ацэнку журы – дыплом ІІ ступені - яна атрымала за выкананне раманса “Зорка”. За сольнае выступленне з песняй “Афганскі вальс” спецыяльным прызам “За волю да перамогі” была заахвочана і Ірына Амельянчук. Упершыню адчула азарт ад выхаду на вялікую сцэну дзевяцігадовая Кацярына Марчук, і хоць у лік пераможцаў дзяўчынка не ўвайшла, яе выступленне члены журы ацанілі высокім балам.
- Канкурэнцыя была даволі высокая. Калі першапачаткова фестываль планаваўся на адзін дзень, то з-за вялікай колькасці заявак падоўжыўся на тры,- расказвае Аксана Яўгеньеўна. Разам з кабрынчанамі на сцэне выступалі вакалісты з Мінска, Калінкавічаў, Брэста, Мазыра і іншых гарадоў Беларусі.
Людміла ДУБІНА.
Поделиться в соцсетях:
