Да пасяўной веснавой кампаніі аграрнікі з СВК “Раданежскі” грунтоўна падрыхтаваліся. Прывялі ў спраўны стан наяўныя сельгасмашыны і набылі два новыя энерганасычаныя трактары “Беларус-3022” са спаранымі коламі, пасяўныя агрэгаты. Як адзначыла галоўны аграном гаспадаркі Галіна Серадовіч, добрая тэхнічная аснашчанасць павысіла прадукцыйнасць працы на веснавой сяўбе.
Механізатары ўнеслі калійныя і фосфарныя ўгнаенні на плошчы 700 гектараў пры плане 800, завяршаецца падкормка азотам азімых збожжавых, шматгадовых траў, рапсу.
Пасеяна 190 гектараў збожжавых і 32 зернебабовых культур пры агульным плане 280, а таксама 100 гектараў зернебабовай сумесі на зялёны корм. Пры спрыяльных умовах надвор’я сяўба ранніх яравых будзе завершана ў бліжэйшы час.
Сёлета ў СВК запланавана будаўніцтва новага малочнатаварнага комплексу. Патрэбнасць у кармах вырасце. Таму плануецца павялічыць плошчы пад кукурузу. Яна займе плошчу 470 гетараў.
На сяўбу ў поўнай меры і ў тэрмін выдзяляюцца гаруча-змазачныя матэрыялы. Супрацоўнікі СВК забяспечваюцца гарачым харчаваннем, якое ў спецыяльных тэрмасах прывозіцца непасрэдна на палі. Прыгатаваннем абедаў займаецца кобрынскае кафэ “Гаспадар”.
У сем гадзін раніцы механізатар Міхаіл Банько на магутным трактары “Беларус-3022” ужо быў на полі вытворчага участка ля ўрочышча “Лішчывень”. А завяршаецца працоўны дзень позна вечарам. Міхаіл Васільевіч адзначае, што высокая вільготнасць глебы, безумоўна, з’яўляецца адчувальнай перашкодай для аграрыяў. Дабаўляе складанасцей і асаблівы рэльеф сельгасугоддзяў, які дзеліць зямлю на адной плошчы на празмерна сухія і забалочаныя ўчасткі. Нягледзячы на гэта, механізатары імкнуцца правесці сяўбу ўсіх культур у кароткі тэрмін, якасна.
Раман МЕЛЬНІК.
Фота аўтара.
НА ЗДЫМКУ: механізатар СВК “Раданежскі” Міхаіл Банько на фоне новага энерганасычанага трактара “Беларус”-3022”.
Поделиться в соцсетях:
