21 год лепшыя па збожжы: ААТ “Агра-Кобрынскае” пабіла новы рэкорд

ААТ “Агра-Кобрынскае” пабіла новы рэкорд: сёлета гаспадарка малаціла збожжавых ў сярэднім 77 ц на круг. На Брэстчыне гэта лепшы паказчык ураджайнасці. У мінулым годзе сярэдняя ўраджайнасць у гаспадарцы была 72 ц/га.

 

Іван Гусак правярае якасць захоўвання збожжа з кладаўшчыком цэнтральнага складаНадзеяй Горнавай.

А 30 гадоў назад, калі ў ААТ “Агра-Кобрынскае” прыйшоў працаваць галоўны аграном Іван Гусак, сярэдняя ўраджайнасць вагалася каля 26 ц/га. Дзякуючы самаадданай працы аграрыяў вось ужо 21 год запар яны лепшыя па гэтым паказчыку ў раёне.

Па словах галоўнага агранома, важным фактарам выдатнага ўраджаю з’яўляецца бездакорнае выкананне тэхналогіі сяўбы. Безумоўна, вялікую ролю адыгрываюць гатункі збожжа, угнаенні, апрацоўка глебы, сродкі абароны раслін, севазварот.

– У нас бальнасць глебы самая вялікая ў раёне – 41,8, а кожнае наша дзеянне накіравана на карысць будучаму ўраджаю,  – расказвае Іван Іванавіч.

Гаспадарка мае невялікія пасяўныя плошчы –  570 га. Са збожжавых тут у асноўным вырошчваюць пшаніцу. Сёлета парадавалі яравыя гатункі – больш за 80 ц/га, а на некаторых палях было і па 110 ц/га.

– Збожжа было шмат, бункер камбайна напаўняўся за 20 хвілін,  – згадвае жніво Іван Іванавіч.

Аграрыі не збіраюцца спыняцца на дасягнутым і спадзяюцца, што ў будучым годзе абавязкова паб’юць свой жа рэкорд.

Людміла ПАШКОВІЧ.

Фота аўтара.