Дзеці міру жывуць на Кобрыншчыне
Нараджэнне дзіцяці – шчаслівая падзея, якой заўсёды радуюцца бацькі, сваякі і блізкія людзі. Ёсць дзеці, якія воляй лёсу з’яўляюцца на свет у значныя святы. Ганаровы спіс нованароджаных, якія з’явіліся на свет у Дзень міру, сёлета папоўніўся імёнамі пяці маленькіх кабрынчан – чатырох хлопчыкаў і адной дзяўчынкі.
Шчаслівымі бацькамі сталі Вера і Юрый Берашэвіч з вёскі Брылёва, у якіх нарадзіўся сын Сямён, і Алена Воран з вёскі Зосіна, якая стала мамай для маленькага Матвея. Таксама маленькія міратворцы з’явіліся на свет у шматдзетных сем’ях Ірыны і Анатолія Ігнацюк, Святланы і Уладзіміра Тунчык з Кобрына і Таццяны і Уладзіміра Сальянчук з аграгарадка Дзівін.
Калі немаўляты трохі адужэлі і падраслі, іх з бацькамі запрасілі на ўрачыстую цырымонію, якая прайшла 5 кастрычніка ў аддзеле ЗАГС Кобрынскага райвыканкама. Пакуль дзеці мірна спалі на руках у сваіх матуль, да маладых бацькоў з віншаваннямі звярнуўся старшыня Кобрынскай раённай арганізацыі ГА “Беларускі фонд міру” Валянцін Трубчык. Ён пажадаў мамам і іх дзецям здароўя і шчасця пад мірным небам і ўручыў сертыфікаты “Дзіця міру”. З прамовай да маладых сем’яў выступіў клірык Свята-Аляксандра-Неўскага кафедральнага сабора іерэй Мікалай Качурка, які пажадаў, каб сімвалічны статус стаў дзецям напамінам аб тым, што яны нарадзіліся ў спакойнай, мірнай краіне і іх місія ў будучыні – рабіць усё, каб яна такой заставалася.
Варта адзначыць, што за гады правядзення акцыі на Кобрыншчыне нарадзіліся і атрымалі міратворчыя пасведчанні 30 дзяцей, якія ў будучым працягнуць справу сённяшніх міратворцаў: будуць прапагандаваць мір, сяброўства і згоду, увасабляць у жыццё ідэі міласэрнасці і гуманізму.
Жанна ЕЛІЗАРАВА.
НА ЗДЫМКУ аўтара: Вера і Юрый Берашэвіч і іх нованароджаны сын Сямён – уладальнік статусу “Дзіця міру”.
