Фестиваль-конкурс инклюзивного творчества детей и молодёжи «Под крыльями Ориона» состоялся в Кобрине.


…Дзяўчына ў інвалідным крэсле спявае песню. Самастойна яна нават не можа трымаць мікрафон – за яе гэта робіць матуля, што стаіць побач зараз – і на працягу ўсяго жыцця, кожны дзень якога становіцца подзвігам для іх абедзвюх. Але яна спявае – і спявае так, што, нібыта па чараўніцтве, у вялікай зале імгненна наступае поўная, абсалютная цішыня… Гэтая цішыня  трывае нават пасля заканчэння песні, і толькі праз некалькі секунд  узнімаецца сапраўдным выбухам авацый — за талент, за чыстую, шчырую дабрыню, за мужнасць — і за неверагодную  волю ў штодзённай бесперапыннай барацьбе з лёсам і з самім сабою…
Гавораць, што калі лёс нешта забірае ў чалавека, ён абавязкова намагаецца неяк кампенсаваць адабранае. Можа, менавіта таму людзі з абмежаванымі магчымасцямі, у адрозненне ад нас, так востра ўмеюць бачыць сэрцам – і чуць душою. Невыпадкова іх уласная творчасць выклікае столькі яркіх і шчырых  эмоцый – як гэта адбылося на адкрыцці міжнароднага фестывалю-конкурсу інклюзіўнай творчасці дзяцей і моладзі “Пад крыламі Арыёна”, якое прайшло нядаўна ў Палацы культуры.
— Вельмі прыемна, што менавіта Кобрыншчына стала на гэтыя дні своеасаблівай сталіцай інклюзіўнай творчасці, — адзначыў у час урачыстага адкрыцця фестывалю намеснік старшыні райвыканкама Валянцін Трубчык. – А ўсім канкурсантам хацелася б пажадаць, каб гэтая кобрынская сцэна стала для іх першай прыступкай вялікага і паспяховага ўзыходжання да высокіх вяршынь майстэрства – і да далейшага самаўдасканалення.
Нагадаем – у мінулым годзе такі фестываль-конкурс  праходзіў  на рэспубліканскім узроўні і адкрыў цэлае сузор’е новых талентаў. Усяго ў конкурсе прынялі ўдзел каля 2,5 тысячы ўдзельнікаў – выхаванцаў інтэрнатаў, дзіцячых дамоў, устаноў адукацыі і культуры. У гэтым годзе фестываль вырас да рангу міжнароднага — да выканаўцаў з Беларусі далучыліся госці з Расіі, Польшчы, Украіны, Казахстана, Літвы, Чэхіі, Эстоніі. Ёсць сярод канкурсантаў і кабрынчане – вучні і выпускнікі Кобрынскай спецыяльнай агульнаадукацыйнай школы-інтэрната.
— Без сумненняў, падобныя мерапрыемствы вельмі патрэбныя нашым дзецям, — расказвае дырэктар школы-інтэрната і член журы фестывалю-конкурсу Тамара Драгун. – Гэта – не проста відовішчны і цікавы конкурс, гэта – новыя цікавыя сустрэчы і знаёмствы, магчымасць адкрыць новыя шляхі да самарэалізацыі і самае галоўнае – паверыць у свае сілы.
А для ўсіх тых, хто прыйшоў паглядзець на ўрачыстую імпрэзу адкрыцця фестывалю, гэты вечар стаў сапраўдным святам – і магчымасцю з іншага боку паглязець на тых, хто побач з намі. Выдатная святочная праграма пад кіраўніцтвам кобрынскай зоркі Вольгі Сацюк і ўдзельніка майстар-класа фестывалю “Пад крыламі Арыёна” мінулага года Руслана Кіма стала сапраўднай феерыяй цудоўных эмоцый – якая, нібыта чароўны бальзам, імгненна напоўніла душу светам і дабрынёй.
На другі дзень фестываль перамясціўся ў Кобрынскую школу мастацтваў, дзе і праходзіла, уласна кажучы, конкурсная праграма. Шматграннасць  і нязменная эмацыянальнасць харэаграфічных і вакальных нумароў падарылі нямала прыемных хвілін гледачам і нямала цяжкасцяў кампетэнтнаму журы, якому ўсё ж такі трэба было вызначыць пераможцаў. Хаця на самай справе было відавочна – усе тыя, хто прымаў удзел у фестывалі-конкурсе, ужо з’яўляюцца пераможцамі і заслугоўваюць самай высокай адзнакі.
У дзень закрыцця фестывалю панавала сяброўская атмасфера, было шмат гасцей, падарункаў, і ні адзін удзельнік не застаўся без увагі.
Арганізатары падзялілі цырымонію ўзнагароджання і цырымонію закрыцця, захаваўшы тым самым інтрыгу ўладальніка гран-пры на заключны канцэрт.
Усім удзельнікам былі ўручаны наборы даведачных буклетаў, кніг і сувеніраў, якія расказваюць пра краіны і мясцовасці, з якіх прыехалі канкурсанты.
Рабяты атрымалі спецыяльныя прызы, граматы і пісьмы падзякі ад пасольстваў краін-удзельніц.
На цырымоніі ўзнагароджання былі ўручаны дыпломы ўдзельнікаў, дыпломы першай, другой і трэцяй ступеняў. Прыемна, што сярод атрымаўшых узнагароды былі прадстаўнікі нашага горада. Уладальнікамі дыпломаў трэцяй ступені сталі Ілья Ногач і Аляксандра Карабчук з Кобрынскай школы мастацтваў, Ганна Гаўрылюк – з РЦДТ, дыпломамі другой ступені ўзнагароджаны Алена Тоўсцік і Елізавета Казак (школа мастацтваў), дыплом першай ступені атрымала Надзея Валасюк з Кобрынскай спецыяльнай агульнаадукацыйнай школы-інтэрната.
На гала-канцэрце зала Палаца культуры была перапоўнена. З прывітальным словам звярнуліся старшыня Кобрынскага райвыканкама Аляксандр Зазуля, пасол Рэспублікі Казахстан у Беларусі Ергалі Булягенаў, кіраўнік прадстаўніцтва Рассупрацоўніцтва ў РБ Віктар Малашэнка.
Арганізатары фестывалю падрыхтавалі шмат сюрпрызаў гледачам і ўдзельнікам. Сувядучым Вольгі Сацюк быў телевядучы канала АНТ Яўген Лашкоўскі, разам з рабятамі на адной сцэне выступілі ўдзельнікі тэлепраекта “Акадэмія талентаў”. На сцэне вырашылася інтрыга: гран-пры заваяваў Ярхат Тажыбаеў з Казахстана, а прыз сімпатый гледачоў па вініках інтэрнэт-галасавання атрымала кабрынчанка Надзея Валасюк.
Адшумеў фестываль, уручаны дыпломы і ўзнагароды, удзельнікі пакідаюць Кобрыншчыну – каб зноў крок за крокам, дзень за днём насуперак усім магчымым перашкодам ісці па жыцці да ажыццяўлення сваіх жаданняў – з воляй, якой часам варта б пазайздросціць усім нам. Так маленькія і ледзь бачныя промні сонца плавяць вялікі айсберг, так прабіваецца праз цвёрдую глебу тонкі парастак будучага магутнага дрэва – так імкненне да прыгажосці і чысціні заўсёды знаходзіць свой шлях, пераадольваючы любыя перашкоды.
Дзмітрый БЯЛОЎ

Добавить комментарий

Ваш e-mail не будет опубликован. Обязательные поля помечены *