Творчыя калектывы Кобрыншчыны трымалі справаздачу.

Сапраўдным святам для прыхільнікаў мастацтва стала правядзенне гарадской і раённай творчых справаздач 14 вакальна-харавых і тэатральных калектываў са званнем “народны” і “ўзорны”, якія адбыліся нядаўна на Кобрыншчыне. Дарэчы, праводзіцца такое мерапрыемства адзін раз у тры гады. Раніцай у суботу першымі, хто ўключыўся ў гэтыя выпрабаванні, сталі лепшыя калектывы Кобрынскага Палаца культуры. Ацэньвала выступленні артыстаў кампетэнтнае журы з ліку супрацоўнікаў УК “Брэсцкі абласны грамадска-культурны цэнтр”.


…І вось пагаслі сафіты. На сцэне Палаца культуры распачаўся спектакль “Снежная каралева” паводле матываў славутай казкі Г.Х. Андэрсена (рэжысёр-пастаноўшчык Таццяна Дрык). Свае таленты дэманстравалі прысутным артысты ўзорнай тэатральнай студыі “Рытм”. Калектыў з’яўляецца шматразовым дыпламантам абласнога фестывалю аматарскага мастацтва “Тэатральнае Палессе” і заслужыў высокі аўтарытэт сярод пастаянных гледачоў.
“Эстафетную палачку” творчага экзамена перанялі прадстаўнікі старэйшага пакалення, якія прэзентавалі свае напрацоўкі ў межах раённага агляду-конкурсу ветэранскіх калектываў і індывідуальных выканаўцаў. Кобрынскія спевакі Уладзімір Брыштэн і Ніна Зубанава пад бурныя апладысменты гледачоў праспявалі славуты “Бацькоўскі дом” і беларускія народныя песні. Артыст Міхась Шамчук “запаліў” глядзельную залу гумарыстычнымі мініяцюрамі і песнямі. А кіраўнік народнага хору “Палескія перазвоны” Зоя Ястрэмская сольна пад акампанемент фартэпіяна выканала знакаміты твор Аляксандра Аляб’ева “Салавей” і беларускую народную песню ”Што за месяц, што за ясны”.


Больш за чвэрць стагоддзя ў Кобрынскім Палацы культуры дзейнічае народны хор ветэранаў вайны і працы, якім кіруе Таццяна Пакалюк. Гэты паважаны калектыў – шматразовы дыпламант фестывалю ветэранскай творчасці “Неспакойныя сэрцы”, жаданы госць на шматлікіх святах. Хор ведаюць не толькі ў Беларусі, але і за яе межамі. Самадзейнікі бліскуча выканалі сваю канцэртную праграму і ўдастоіліся авацый.


Пяцьдзясят тры гады з моманту заснавання сёлета адзначыў народны духавы аркестр Кобрынскага Палаца культуры пад кіраўніцтвам Яўгена Бельскага. Гэты калектыў – уладальнік дыпломаў прэстыжнага абласнога фестывалю духавой музыкі “Фанфара”. Музыканты аркестра сваёй творчасцю ўпрыгожваюць шматлікія раённыя святы. Асаблівы шарм музычнай праграме аркестра надае дэфіле мажарэтак. У той дзень музыканты цудоўна выканалі творы беларускіх, рускіх і замежных аўтараў. Шэраг кампазіцый прысвячаўся 70-годдзю вызвалення Беларусі ад нямецка-фашысцкіх захопнікаў.
Фінальным акордам стала выступленне народнага ансамбля народнай песні “Бурштын” на чале з Таццянай Татолінай, які з’яўляецца сапраўднай “візітнай карткай” Кобрыншчыны. Калектыў прэзентуе беларускі каларыт у тым ліку і на міжнароднай арэне, з’яўляецца лаўрэатам і дыпламантам прэстыжных фестываляў у Беларусі, Германіі, Індыі, Эстоніі, Малдове, Польшчы.


А працягваался мерапрыемства ў дзіцячай школе мастацтваў. Перад пачаткам выступленняў артыстаў у фае разгарнулася маштабная выстава народнай творчасці ветэранаў вайны і працы. Кожны жадаючы мог азнаёміцца з ткацтвам, вышыўкай, вязаннем мясцовых майстроў.
Непаўторным і змястоўным быў канцэрт народных калектываў Кобрыншчыны. Асабліва запомніліся песні на пінска-палескім дыялекце, якія так добра вядомыя ўсім нам яшчэ з дзяцінства… Як адзначыла дырэктар раённага метадычнага цэнтра аддзела культуры, ідэалагічнай работы і па справах моладзі райвыканкама Вольга П’янцава, артысты добра падрыхтаваліся да творчага экзамена, абнавілі рэпертуар, як, напрыклад, народныя хары з Балот, Гарадца, Залесся, Хідраў. У апошняга калектыву пад кіраўніцтвам Яўгена Лесіка з’явілася шмат песень у тым ліку і брэсцкага кампазітара Віктара Фяцісава. А ў нядзелю на сцэне дзіцячай школы мастацтваў і Палаца культуры выступалі ўзорны ансамбль народнай песні і музыкі “Таўкачыкі”, узорны баянны аркестр, народны тэатр песні, музыкі і гульні “Крынічка”, народны хор “Палескія перазвоны”.


Як паведаміла галоўны рэжысёр УК “Брэсцкі абласны грамадска-культурны цэнтр” Галіна Гурынчук, у выніку ўсе калектывы з гонарам пацвердзілі свае званні. А гэта прамое сведчанне таго, што творчасць на Кобрыншчыне знаходзіцца на пастаянным уздыме і мае ўсе ўмовы для далейшага дынамічнага развіцця.
Раман МЕЛЬНІК.
НА ЗДЫМКАХ: узорная тэатральная студыя “Рытм”; народны ансамбль народнай песні “Бурштын”; выстава работ Ніны Паўлючык з в. Кісялёўцы; народны духавы аркестр і дэфіле мажарэтак; народны хор ветэранаў вайны і працы.
Фота аўтара.

Добавить комментарий

Ваш e-mail не будет опубликован. Обязательные поля помечены *